La Passem 2022 qu’avè augan ua mairia : Terèsa Pambrun. Dimenge 5 de junh, l’arribada a Pau que’s passè fin plan !
Que sèi un país entre montanha e mar.
Un país de lacas e d’arrius.
Un país de vias e de sendèrs.
De camins e de rotas.
E aqueth país que’s conda en ua lenga millenària. Ua lenga aimada. Ua lenga bailinada. Ua lenga voluda. Ua lenga qui disem occitana quan la vegem de luenh, qui sabem gascona quan la sasim a nosta.
En aqueth país de Gasconha que i son mainadas e mainats, gojatas e gojats, hemnas e òmis qui tots an era madeisha ahida : enténer era lenga loa a cantar per totas eras contradas. Dera montanha ara mar, de lacas en arrius, de vias en sendèrs. De camins en rotas.
Alavetz que s’avian.
De un en un, que’s prenen pera man, de pas en pas que’n van portant un messatge d’ahida, un messatge de fé, un messatge de volontat. E arren ne los poderà dravar. Arren ne los saberà estancar. Tau un gran fluvi qui arròtla eras suas peiras a maugrat de tot eths empaishs, de tots eths trebucs, que tiran en davant.
Coma ith, coma tu, que sòi d’aqueth país e mes que tot que sòi d’aquera lenga. Que l’èi a shurshurejar en amna. Qu’ei era mia hont, era mia sang. E que la voi luenh e longtemps saber a díser eth noste pòple.
Alavetz com tu, com vos, que la pòrti de dia en dia en davant, a pas petits, a pas grans : pito, pato, pito pato, la passem, anem ! anem ! pito pato, pito pato la passem, anem anem…
Tresià Pambrun, Pau lo 5 de junh de 2022
Tintas 