Que poderem díser un grope, un abalòt, un aròu ; o lavetz ua gaspa, un boquet, un flòc o un mat ; o tanben, coma taus pins, ua sèga ; o encòra un eishami… Eh ben non, lo tèrmi qui pertot s’impausa qu’ei l’equivalent anglés d’aqueths mots : cluster. Atau que’n va de las mòdas. Atau que’n va deus temps qui vivem. L’irrespècte qui manifestam collectivament decap au noste enviroament que nse torna, tau un arrevira-marion, pim suu nas ! E aqueste que se nse bota a colar. Que’n perdem lo gost e lo sentit.
Bèth pos de frèbe, la lenga estamada e lo nas qui hè gotèra non avem arren entà’s suenhar. Que nse demora de córrer dinc au casau e de pregar, coma hasèn los noste davancèrs :
Adiu mendràs,
Jo qu’èi la frèbe e tu non l’as,
Ací que’t pòrti pan e sau
Entà que’m tiris lo men mau !
Tintas 